Ciidamada daraawiishta dowlad Goboleedka Galmudug ayaa xalay howlgal qorshaysan ka fuliyay deegaan lagu magacaabo Godyaanyo oo ku yaalla Koonfurta Gobolka Mudug.
Ciidamada ayaa howlgalkaan ku burburiyay gaari la sheegay in walxaha Qarxa ay ka soo buuxiyeen Al shabaab, sidoo kalena ciidamada ayaa howlgalkaas ku dilay xubno ka tirsan Shabaabka, waa sida hadalka loo dhigay.
Saraakiisha Daraawiishta iyo kuwa deegaanka Qararow ayaa Warbaahinta Qaranka u xaqiijiyay inay howlgalkaan xalay saqdii dhexe dhacay, isla markaana looga hortegay qaraxyo la doonayey in lagu dhibaateeyo shacabka.
Todobaadkii hore ayey aheyd markii Ciidanka Xoogga dalka gaar ahaan qeybta 21-aad iyo kuwa Galmudug ay gacanta ku dhigeen gaari laga soo buuxiyey waxyaabaha qarxa iyo rag la socday, kuwaasi oo baaris lagu wado.
Ciidamada dowladda Federaalka iyo kuwa Galmudug ayaa shalay qarxiyey qaraxyadii ay qabteen, waxaana Saraakiisha Ciidamada ay sheegeen inay dardargelin doonaan howlgalada.
