Ra’iisul Wasaarihii hore ee Soomaaliya Cali Maxamed Geedi ayaa War kasoo saartay ansixinta Metelaadda Gobolka Banaadir ee Aqalka Sare ee dalka oo shalay ay ansixiyeen Xildhibaanada Golaha Shacabka.
Cali Geedi oo soo saaray qoraal dheer uu kaga hadlay ansixinta Metelaadda Gobolka Banaadir ayaa waxaa sheegay in Go’aan ansixinta uu yahay mid baal dahab ka galay taariikhda Gobolka iyo guud ahaan Qaranka, isagoo sheegay in tallaab geesinimo leh ee uu qaaday Golaha Shacabka BFS.
Shacabka Gobolka Banaadir iyo Gobolada kale ayuu RW hore Cali Geedi ugu baaqay inay ay taageeraan Golaha Shacabka kana difaacaan ciddii isku dayda inay wiiqdo geeddi socodka sharciga iyo hannaanka doorashooyinka dalka ee qof iyo cod.
Ugu dambayntii Cali Geedi ayaa waxaa uu sheegay in shacabka Banaadir iyo guud ahaan ummadda Soomaaliyeedba ay baarlamaanka Federaalka uga fadhiyaan dhamaystirka maqaamka caasimadda Muqdisho.
Hoos ka Akhriso Qoraalka uu soo saaray Cali Geedi.
Golaha Shacabka BFS wuxuu u codeeyey, aqlabiyad buuxdana ku meel mariyey sharciga matalaadda siyaasadeed ee bulshada Soomaaliyeed ee Gobolka Banaadir. Waa go’aan baal dahab ka galay taariikhda Gobolka iyo guud ahaan Qaranka Soomaaliyeed. Waa tallaab geesinimo leh ee uu qaaday Golaha Shacabka BFS uguna hiilliyey muwaadiniintiisa xaqooda dastuuriga ah laga curyaaminayey muddada dheer..
Shacabka sharafta leh ee Gobolka Banaadir iyo Gobollada kaleba waxaa iyagana laga rabaa in ay taageeraan Golaha Shacabka kana difaacaan ciddii isku dayda inay wiiqdo geeddi socodka sharciga iyo hannaanka doorashooyinka dalka ee qof iyo cod ee hoggaaminayo Guddiga Madaxabannaan ee Doorashooyinka Qaranka, loogana gudbayo doorasho dadban iyo in masiir ama xaq-siyaasadeed muwaadin uu ku sii jiro gacan shakhsi kale, darajada uu rabo ha lahaadee.
Allaha awoodda leh kaddib, waxaa mahaddaas iska leh Golaha Shacabka BFS oo shalay ansixiyey 13 xubnood ee shacabka Gobolka Banaadir ku matali doona Aqalka Sare ee BFS.
Si ka sarreysa, qaddarin iyo mahadcelin aan la koobi karin waxaa leh Madaxweyne Maxamed Cabdullaahi Farmaajo oo furitaankii kalfadhigii 7aad ee Baarlamaanka Federaalka Soomaaliya (06.06.2020) uga dhawaaqay hindisaha matalaadda shacabka Gobolka Banaadir, si qiiro lehna uga codsaday inuu ku xurmeeyo kana aqbalo, taasoo Golaha Shacabka BFS uu hoosta la xarriiqay fuliyeyna. Madaxweyne Farmaajo oo gudanaya waajibkiisa dastuuriga ah, kana jawaabaya rabitaanka dadkiisa, ayaa u bareeray oo dhigay sumad ama rikoodh (record) ay dhigi waayeen Madaxweyneyaashii ka horreeyey.
Ugu dambayntii, shacabka Banaadir iyo guud ahaan ummadda Soomaaliyeedba waxay baarlamaanka uga fadhiyaan dhamaystirka maqaamka caasimadda Muqdisho oo ah gool kale oo dhalintiisa laga sugayo Goleyaasha Qaranka iyo Madaxweynaha JFS.