Dowladda Ingiriiska oo dadkeeda ka dalbatey iney isaga baxaan Itoobiya

Dadka Ingiriiska ah ee kusugan Itoobiya, ayaa lagu booriyey iney isaga baxaan inta ay duulimaadyada ganacsiga ah ay heli karayaan.

Wasiirka Ingiriiska u qaabilsan Africa, Fiki Ford, ayaa sheegay in dhiilada colaadeed ee dhinacyada ku dagaalamaya Itoobiya ay cirka isku sii shareertey, isagoo intaa ku darey in dagaalka haatan socda aannan lagu xalin karo cudud ciidan.

Waxaa haatan socda dadaalo caalami ah, kuwaasoo lagu dhex dhexaadinayo mucaaradka iyo dowladda Itoobiya.

 

Hey’addaha u dooda xuquuqda aadanaha, ayaa sheegaya iney jiraan xiritaan aan kala sooc laheyn oo ka dhacaya caasimadda, kaasoo u muuqda in lagu bartilmaameed sanayo qawmiyado gaar ah.

Ugu yaraan sagaal xubnood oo katirsan shaqaalaha Qaramada Midoobay, iyo kuwa kale oo la xiriira, ayaa lagu xirey Addis Ababa, sida uu sheegay afhayeenka Qaramada Midoobay.

Si kastaba ha ahaatee, madaxa booliiska, Fasikaw Fanta, ayaa u sheegay BBC-da in kuwa la xirey loogga shakiyey iney taageerayeen TPLF, iyo kuwa kale oo ay dowladdu mamnuucdey.