Labo Askari oo isku dishay Degmadda C/casiis ee Muqdisho.

Goobjoogayaal ayaa sheegay inay 2 Askari geeriyootay, dhowr kalena dhaawacmeen, kadib, markii ay isku rasaaseeyeen Suuqa Qaadka ee
Degmadda C/casiis ee magaalladda Muqdisho.

Muranka ayaa ka dhashay qaabka ay u qeybsan lahaayeen Qaadka ay soo wada iibsadeen, waxayna rasaastu bilaabantay ka hor inta aan qaadka la kala qeybsanin.

2-Askari ayaana isla goobtii ku qudh baxday, halka kuwa kalena ku dhaawacmeen, kuwaasi oo loola cararay Isbitaalka.

Dhacdadan ayaa ku soo beegmayso iyadoo uu Taliska Sare ee Ciiddanka Boliska Soomaaliyeed horey uga mamnuucay  inay Ciiddanka xilliyadda shaqada ay u fariistaan inay qayilaan.

Si kastaba ha ahaatee, Dowladda Federalka ayaa la gudboon in la mamnuuco Qaadka maalin kasta ka imaanayo Dalaka Kenya, iyadoo ay Dowladda Kenya ka macaashto qaadka Malaayiin Dollar.

Dowladaha Midowga Europe, gaar ahaan Britain iyo Holland waxaa laga mamnuucay Qaadka, iyadoo lagu tilmaamay inuu yahay Daroogo, heerka C.

Dhinaca kale, WHO ayaa sheegtay in waalida xooggan ee ka jirta Somalia ay ka dhalato Dhallinyaradda oo si xooggan u raamsada Qaadka, iyagoo ku andacoonayo inay isku illowsiinayaan shaqo la’aanka iyo Fekerka badan.

© Radio Dalsan