Dowladda Federalka oo raalli-gelin ka bixisay Muwaadinkii Shiinaha ee ku geeriyooday Is-qarxintii Alshabaab ee Hotelka Jaziira

Danjrihii hore ee Somalia uga wakiilka ahaa dalka Shiinaha, Ambassador Mohamed Awil ayaa sheegay inay aad uga xun yihiin geerida Muwaadinkaasi oo ka mid ahaa Ilaaladda Safaaradda Shiinaha ku leedahay magaalladda Muqdisho, kaasi oo dhawaan ku geeriyooday falkii Is-qarxinta ee ay Alshabaab ka geysteen Hotelka Jaziira.

Diplomaasigu waxa uu tilmaamay inay Dowladda Somalia aad uga xun tahay geeridaasi, isla markaana ay u tacsiyadeynayaan Dowladda Shiinaha iyo qoyska uu ka geeriyooday.

Ambassador Mohamed Awil waxa uu tilmaamay inuusan shilkaasi wax u dhimi doonin Xiriirka Somalia iyo Shiinaha, wuxuuna ku baaqay in la kordhiyo Taageeradda ay Shiinaha siiyaan Somalia iyo in loo midoobo La-dagaalanka Alshabaab.

Hadalka Danjirihii hore ee Somalia uga wakiilka ah dalka Shiinaha ayaa yimid, iyadoo maydka Muwaadinka Shiinaha shalay loo duuliyey magaalladda Nairobi, si looga sii gudbiyo dalka Shiinaha.

Is-qarxintii ay Alshabaab bishan July 26-dii ka geysteen Hotelka Jaziira waxaa ku geeriyootay 14-qof oo u badnaa dad rayid ah, waxaana ku dhaawacantay tobaneeyo kale, oo ay ku jiraan saddex u dhalatay Shiinaha.

Xigasho: ecns.cn