Kooxo ku hubeysnaa Bastoolad ayaa Caawa xaafad ka tirsan degmada Kaaraan ee Gobolka Banaadir waxaa ay ku dileen Nabadoon Caan ahaa, waxaana dilka kasoo baxaya faah faahino dheeraad ah.
Goobjoogayaal ayaa waxaa ay ku warrameen in Nabadoonka ay toogteen rag ku hubeysan Bastoolad, xili uu ku sugnaa Xaafadda Jamhuuriya ee Kaaraan, isagoo u geeriyooday xabbado lagu dhuftay.
Marxuumka ayaa lagu magacaabi jiray Nabadoon Cabdullahi Ciise Hilowle, isagoo kamid ahaa dhaqanka Soomaaliyeed, waxaana goobta ka baxsaday raggii ka dambeeyay falkaas dilka ah.
Ciidamo ka tirsan kuwa Booliska dowladda Federaalka Soomaaliya ayaa sida caadada aheyd tegay goobta uu falku ka dhacay, isla markaana halkaas ka qaaday Meydka Marxuumka, sidoo kalena sameeyay baaritaano ku aadan dilkaas.
Magaalada Muqdisho ee Caasimadda dalka ayaa tan iyo markii la guda galay bisha barakeysan ee Ramadaan ayaa waxaa ka dhacay dilal qorsheysan oo geysteen kooxo hubeysan oo aan heybtooda la garan, waxaana falalka qaarkood sheegtay Al-shabaab.
