Madaxweyne Biixi oo Jawaab ka bixiyey Cabashada Mucaaradka Somaliland ee Doorashada

Madaxweynaha Somaliland, Muuse Biixi Cabdi, ayaa shacabka u sharraxay ujeeddada ay salka ku hayso cabashada kasoo yeereysa axsaabta mucaaridka ah ee ku saabsan hirgelinta doorashooyinka kusoo foolka leh.

Madaxweyne Muuse Biixi Cabdi oo ka hadlay munaasabad, ayaa ugu horrayn bulshada usoo jeediyey inaanay dhib weyn u arkin buuqa siyaasadeed ee taagan, shaqada xisbiyaduna tahay dood iyo kala jiidashada shacabka,

Wuxuu axsaabtana ugu baaqay inaanay marnaba ka tegin milgaha iyo sharafta, waxana uu yiri ,“Shacaboow mid ogaada, yaan laga sasin buuqa iyo muranka asxaabta, waana meel talo lagu wadaagayo oo ra’yiyo kala duwan baa la isla jiidaya , laakiin ma aha meel lagu ducaysto oo masaajidka oo kale ah, doodda xisbiyada iyo muranka xisbiyadu waa xaq dastoori ah, waana waxa aynu u abuurannahaye waa inaynu aqbalnaa.

Madaxweynuhu ayaa waxa uu sheegay in aan lagu socon Karin rabitaanka cid gaar ah, sharciyadda aanay taas sinaba u yeelaynin,“Haddii ay dooddu inaga gasho waxaan doonayo oo aan helo mooyaane waan duminayaa, taas diintuna ma oggola dastuurkuna ma oggola, sharcigana ma oggola oo doon baynu wada saarannahay,

Madaxweynaha Somaliland, Muuse Biixi Cabdi, waxa uu si gaar ah uga hadlay doodaha axsaabta mucaaradku aaminsan yihiin iyo sida ay qodobada ay cuskanayaan u jaban yihiin, isaga oo caddeeyey in sharciyadda iyo go’aamadii maxkamadda sare soo saartay aan dhannaba loo dhaafi Karin,

Madaxweynuhu isaga oo hadalkiisa sii wata waxa uu intaas ku daray,“Qodobka labaad ee aanu isku haynaa waxa weeye doorashadii madaxweynaha waqtigeedii halla qabto, yaase diiddan, in doorashadii madaxweynaha waqtigeedii la qabtana waxa muddayn kara Komishanka doorashooyinka, guddidii doorashooyinka oo dhexdooda khilaaf ka yimi oo shaqadii ka wada tagtayna degdeg baan usoo magacaabay, waxana aan u diray Baarlamaanka, labada xisbi ee mucaaridka ah baan ugu badan golaha, saddex buu Baarlamaanku diiday, saddexdabana cidda diidday waxay ahaayeen xisbiyada mucaaridka ah.”

Madaxweyne Muuse Biixi Cabdi ayaa waxa uu mucaaradka ugu baaqay inay fasaxaan xubnaha Komishanka doorashooyinka ah ee ay xildhibaannadoodu soo celiyeen, si loo dardargeliyo doorashooyinka, maaddaama oo ay komishanku udub-dhexaad u yihiin dhammaanba doorashooyinka.

Ugu dambayntii madaxweynaha Somaliland, Muuse Biixi Cabdi, waxa uu caddeeyey inuu mar kasta diyaar u yahay in la wada-hadlo, faq iyo fagaarena la isku arko, isaga oo ka digay isku day kasta oo ka hor imanaya shuruucda.

About Webmaster

View all posts by Webmaster