Maamulka Puntland ayaa ka Jawaabay Qoraalkii uu Maanta soo saaray Wasiirka Qorsheynta Xukuumadda xilgaarsiinta Jamaal Maxamed Xasan oo uu ku sheegay inuu Madaxweynaha Puntland yahay Musharax Madaxweynaha Soomaaliya, uuna faragelin ku haayo Guddiyada doorashooyinka Puntland.
Afhayeenka Madaxtooyada Puntland Jaamac Dabaraani oo Qoraal soo dhigay bartiisa Twitter-ka ayaa waxaa uu ku sheegay in hadalka Wasiir Jamaal uusan waxba ka duwaneyn kuwii hore ugu adeegsan jiray hurinta Colaado iyo isku dhacyo ka dhaca Puntland, waa sida uu yiri.
Jaamac Dabaraani ayaa nasiib darro ku tilmaamay hadalka kasoo yeeray Wasiir Jamaal ee ahaa in Madaxweyne Saciid Cabdullaahi Deni yahay Musharax Madaxweyne oo aan ku dhawaaqin Musharaxnimadiisa, isla markaana uu faragelin ku haayo Guddiyada doorashooyinka Puntland.
“Puntland waa dowlad jirta 23-sanno, horey waxaa uga dhacay doorashooyin heer Puntland iyo heer Federaal ah, oo qeybtood hal cod lagu kala adkaaday. 23 sano biseyl iyo qaangaadhnimo ka muuqato Puntland, waa nasiib-daro inaad isku daydo inaad sawir xun ka bixiso Puntland iyo dadkeeda, Taariikhda ayaa is qoreysa” ayuu yiri Jaamac Dabaraani.
Jamaal Maxamed Xasan ayaa Madaxweyne Saciid Cabdullaahi Deni ugu baaqay inuu faraha kala baxo Arrimaha doorashooyinka, isla markaana uu ka aamuso, isagoona sheegay in Musharaxiinta Baarlamaanka ay walaac ka muujiyeen Deni.
