Madaxweynaha dalka Koonfurta Afrika, Jakob Zuuma iyo dhigiisa dalka Zimbabwe, Robert Mugaabe ayaa Kulan khaas ah ku yeeshay magaalladda Johannesburg, iyagoo ka wada hadlay xiriirka labadooda dal iyo xaalladdaha guud ee dalalka Afrika.
Warbaahinta dalka Koonfurta Afrika ayaa shaacisay inay labada Madaxweyne cambaareeyeen weerarkii ay Dagaalaamayaasha Alshabaab bishan April 2-dii ku qaadeen Jamaacadda Garissa, oo lagu dilay ku-dhawaad 150-arday.
Madaxweyne Jakob Zuma ayaa sheegay inay isaga iyo Mugaabe si xooggan u cambaareynayaan weerarkaasi.
“Waxaan u mideysanahay cambaareynteennba weerarkaasi” ayuu yiri Madaxweyneha dalka Koonfurta Afrika.
Sidoo kale, Madaxweynaha dalka Zimbabwe, ayaa isagana ugu baaqay Dowladaha Afrika in loo midoobo sidii loola dagaalami lahaa Alshabaab iyo kooxaha kale, waa sida uu hadalka u yiri.
In ka badan 400 oo qof ayaa la sheegay inay Dagaalamayaasha Alshabaab ku dileen gudaha dalka Kenya, tan iyo markii uu Madaxweyne Uhuru Kenyatta qabtay xilkaasi bishii April ee sannadkii 2013-kii.
