Dacwad-oogaha Kenya ayaa sheegay inay hayaan Caddaymo cusub oo muujinaya in Afar haween oo u xiran inay ku biiri lahaayeen Alshabaab ku lug leeyihiin Weeraradii ay Dagaalamayaasha Alshabaab ku qaadeen Xarunta Dukaamaysiga Westgate ee magaalladda Nairrobi iyo Jaamacadda Garissa.
Saddex ka mid ah Gabdhaha la soo eedeeyey oo u kala dhashay dalalka Kenya iyo Tanzania ayaa lagu kala magacaabo Khadiija Abuubakar C/qaadir, Maryan Cabuud Saciid iyo Umul-kheyr Saadir Cabdalla.
Boliska ayaa sheegay inay Milliteriga Kenya ka soo qabteen gabdhahaasi Degmadda Ceel-waaq bishii Marso 27-dii ee sannadkan, xilli ay ku sii jeedeen Somalia si ay ugu biiraan Alshabaab.
Sidoo kale, Gabadha lagu magacaabo Xaliimo Aadan Cali ayaa wacxay Boliska qabteen bishii April ee sannadkan, xilli ay ka soo ambabaxday Nairobi, kuna sii jeeday magaalladda Mombasa.
Dacwad-oogayaasha Kenya waxay sheegeen inay baareen Xogta ku kaydsan Mobayl iyo Laptop ay lahayd mid ka mid ah Eedeysanayaashaasi, isla markaana laga helay caddaymo ku xiriirsna Weeraradii Westgate iyo Jaamacadda Garissa.
Gabdhahaasi waxaa kaloo la sheegay in magacyadda ku jira Telefoonkooda laga helay gabar kale oo la tuhunsan yahay oo lagu magacaabo Faadumo Saciid oo ka soo jeeda Degmadda Malinidi, taasi oo weli la baadi-goobayo.
Waaxda Dembiyadda Internetka ee Boliska Kenya ayaa soo bandhigay inay Eedeysanayaahaasi khadka Isgaarsiinta ee Skype kula xiriireen dad ku nool magaalladda Mombasa iyo dalalka Sri Lanka, Qatar, Turkey, Rwanda, Britain iyo Imaaraadka Carabta.
Eedeysanayaasha ayaa la filayaa in mar kale la soo taago Maxkamadda, iyagoo haatan ku xiran yihiin Xabsiga weyn ee magaalladda Mombasa ee loo yaqaano Shimo La Tewa Prison.
© Radio Dalsan
