Muqdisho – Dowladda Federaalka Soomaaliya ayaa si cad u eedeysay madaxa ku-meelgaarka ah ee Hawlgalka Taageerada iyo Xasilinta Midowga Afrika ee Soomaaliya (AUSSOM), Sivuyile Thandikhaya Bam, iyadoo ku tilmaantay in uu carqaladeynayo horumarka dalka isla markaana uu muujinayo taageero muuqata oo uu u hayo ururka Al-Shabaab.
Wasiirka Arrimaha Dibadda Soomaaliya, Ahmed Macallin Fiqi, oo wareysi gaar ah siiyay Telefishinka Qaranka Soomaaliyeed (SNTV) Khamiistii, ayaa sheegay in dowladda Soomaaliya ay tixgelinayso inay qaadayso tallaabooyin adag oo lagaga jawaabayo ficillada Bam, kuwaas oo lagu sheegay kuwo si toos ah uga hor imaanaya maslaxadda qaran iyo mudnaanta amni ee dalka.
“Ninkan madaxda ka ah AUSSOM wuxuu muddo dheer ahaa qof lagu tuhunsanaa inuu si hoose ula safan yahay Al-Shabaab, balse hadda muuqdii wuu baxay – si cad ayuu u muujiyay taageerada uu u hayo kooxdaas argagixisada ah,” ayuu yiri Wasiir Fiqi.
Wasiirku wuxuu ku eedeeyay Sivuyile Bam inuu hadallo aan masuuliyadi ku dheehnayn ka jeediyay Golaha Ammaanka ee Qaramada Midoobay, kuwaas oo u muuqday in Al-Shabaab ay raadineyso sharciyad siyaasadeed isla markaana aysan hadda weerarin dadka rayidka ah – arrimo Wasiir Fiqi ku tilmaamay “halis ah” oo si buuxda uga hor imaanaya xaqiiqada jirta.
“Hadallada noocan oo kale ah waa kuwo aan sal iyo raad toona lahayn, waxayna khatar weyn ku yihiin sugnaanta qaranka Soomaaliyeed. Waxay u muuqdaan kuwo la doonayo in sharciyad siyaasadeed lagu siiyo koox si joogto ah u beegta shacabka Soomaaliyeed, u qarxisa suuqyada, masaajidda, iyo xarumaha dowladda,” ayuu yiri Wasiir Fiqi.
Ilo diblomaasiyadeed oo lagu kalsoon yahay ayaa u sheegay HOL in Wasaaradda Arrimaha Dibadda ay hadda qiimeyneyso in Bam si rasmi ah looga masaafuriyo dalka Soomaaliya, tallaabo haddii la qaado ay dhaawac weyn u geysan karto xiriirka u dhexeeya Soomaaliya iyo Midowga Afrika – xilli muhiim ah oo uu dalku marayo marxalad kala guur amni.
Hawlgalka AUSSOM ayaa beddelay hawlgalkii ATMIS bilowgii sanadkan 2024, iyadoo la filayo inuu si buuxda ula wareego howlaha nabad ilaalinta bartamaha sanadkan.
Ururka Al-Shabaab ayaa weli si rasmi ah loogu aqoonsan yahay urur argagixiso ah – kaddib markii si cad loogu calaamadeeyay liiska argagaxisada ee dowladda Soomaaliya, Qaramada Midoobay, Mareykanka, Midowga Yurub iyo Midowga Afrika. Kooxdu waxay weli sii wadaan weerarro is-daba joog ah oo lagu beegsanayo dadka rayidka ah, ciidamada qalabka sida iyo madaxda dowladda, iyadoo ay ka go’an tahay inay afgembi ku sameyso dowladda federaalka ah isla markaana ay dalka ku xukunto aragtideeda xagjirka ah ee shareecada Islaamka.
Dowladda Soomaaliya ayaa shaacisay in aysan u dulqaadan doonin wax kasta oo wiiqaya nabadda, xasiloonida iyo madax-bannaanida siyaasadeed ee dalka.
