Wararka laga helayo duleedka Magalada Muqdisho gaar ahaan deegaanka tareedisho ayaa waxaa ay sheegayaan in halkaasi goordhow uu ka dhacay qarax khasaaro geystay.
Qaraxa oo ahaa miinada nooca dhulka lagu aaso ayaa waxaa lala eegtay Gaari ay wateen Ciidamo ka tirsan Millateriga Soomaaliya,waxana la sheegay in uu jiro khasaaro dhimasho iyo dhaawac ah oo ka dhashay qaraxaas.
Goobjoogayaal ayaa waxa ay sheegeen in qaraxa oo wadada dhinaceeda lagu aasay ay ku geeriyoodeen Darawalkii waday Gaariga ay wateen Ciidamada Dowladda oo ahaa Surf iyo Darawal Mooto Bajaaj.
Qaraxa kadib ayaa waxaa Rasaas furay Ciidamadii qaraxa lala eegtay,waxaana la sheegay in rasaastaas ay dad ku dhaawacmeen,hayeeshee aan weli tirada la helin.
Waxaa hakad galay isku-socodka dadka iyo Gaadiidka ee Goobta uu qaraxa ka dhacay ee deegaanka Tareedisho ee duleedka Muqdisho,waxaana qaar ka mid ah dadka ku nool ay sheegeen inay cabsi dareemayaan.
