Saaka waxaa si lama filaan ah loo hakiyay dhammaan duulimaadyadii u socday magaalada Baydhabo, taas oo abuurtay xaalad jahwareer iyo walaac ku dhex abuurtay rakaabkii diyaaraduhu ay qaadi lahaayeen. Rakaab farabadan oo ku sugnaa garoonka diyaaradaha ee Aadan Cadde ayaa saacado xannibnaa, hase yeeshee wararkii ugu dambeeyay ayaa xaqiijinaya in hadda duulimaadyadii la fasaxay, oo diyaaradihii dib u billaabeen inay ku socdaalaan magaaladaasi.
Inkastoo amarka hakinta duulimaadyada aanu si rasmi ah u caddeyn cida ka dambeysay, xubno ka tirsan Madaxtooyada Koonfur Galbeed ayaa sheegay in Dowladda Federaalka Soomaaliya ay ka dambeysay go’aankaasi, iyagoo tilmaamay in arrintani qeyb ka tahay khilaafka u dhexeeya Dowladda Federaalka iyo Maamulka Koonfur Galbeed.
Weli lama oga sababta rasmiga ah ee ka dambeysay in la joojiyo duulimaadyada, inkastoo uu jiray hoos u dhac xiriirka u dhexeeya labada dhinac, tan iyo markii Maamulka Koonfur Galbeed uu taageeray xiriir xooggan oo ay la yeesheen Dowladda Itoobiya.
Dadka rakaabka ahaa ee ku xanibnaa garoonka ayaa muujiyay caro iyo niyad-jab, iyaga oo ku tilmaamay in arrimaha siyaasadda ee heer qaran ay si toos ah u saameeyeen safarkooda iyo noloshooda maalinlaha ah. Arrintan ayaa soo kordhineysa walaac horleh oo ku saabsan saameynta is-qabqabsiga siyaasadeed ee ka dhex aloosan Dowladda Dhexe iyo dowlad-goboleedyada, taas oo hadda gaartay heerka ay dib u dhigto adeegyada muhiimka ah ee ay dadweynuhu u baahan yihiin, sida duulimaadyada iyo isu-socodka guud.
Inkasta oo hadda xaaladda garoonka la dejiyay oo duulimaadyadii dib loo fasaxay, su’aalo ayaa weli ka taagan mustaqbalka xiriirka u dhexeeya Villa Somalia iyo Maamulka Koonfur Galbeed, iyadoo ay muuqato in khilaafka siyaasadeed uu weli sii socon karo haddii xal buuxa aan laga gaarin arrimaha taagan.
