Waxaa si rasmi ah u billowday gudashada waajibaadka Xajka ee sannadkan, iyadoo ku dhowaad laba milyan oo Muslimiin ah oo ka kala yimid daafaha caalamka ay maanta u guureen deegaanka barakeysan ee Mina, si ay halkaas uga bilaabaan rukunnada waaweyn ee Xajka.
Xujeyda, oo ay ku jiraan in ka badan 11,000 oo Soomaali ah, ayaa ka dhaqaaqay hoteeladii ay degganaayeen gudaha magaalada Makka, iyaga oo degey teendhooyin casri ah oo si gaar ah loogu diyaariyey adeegyada Mina. Berri ayaa la filayaa inay istaagaan Buurta Carafo, taas oo ka mid ah rukunnada ugu muhiimsan ee Xajka islamarkaana loo aqoonsan yahay maalinta ugu weyn ee barakeysan.
Acmaasha Xajka ee lagu wado in lagu fuliyo maalmaha soo socda waxaa ka mid ah:
-
Dhagax-tuurka (Jamaraat)
-
Xiirashada timaha
-
Dawaafka Beytka (Xaramka Makka)
Kadib gudashada acmaashaas, xujeydu waxay dhowr maalmood ku sugnaan doonaan Mina, iyagoo sii wada dhagax-tuurka, waxaana ay halkaas kadib bilaabi doonaan isu diyaarinta safarkooda dib ugu noqonaya dalalkooda.
Sanadkan Xajka ayaa kusoo aaday xilli kuleyl daran laga dareemayo gobolka Hijaz, arrintaas oo keentay in mas’uuliyiinta boqortooyada Sacuudiga ay si weyn u kordhiyaan adeegyada caafimaad, qaboojin iyo gaadiid, si loo xaqiijiyo in xujeydu ay waajibaadkooda u gutaan si nabad ah oo xasiloon.
Wasaaradda Xajka ee Sacuudiga ayaa ugu baaqday xujeyda in ay raacaan tilmaamaha caafimaad iyo amni ee la siiyay, si looga fogaado wax kasta oo khalkhal geliya habsami u socodka acmaasha barakeysan.
