Waxaa goor dhow ka soo dagay garoonka diyaaradaha Aadan Cadde ee Muqdisho wafdi uu hoggaaminayo xoghayaha fulinta ee Urur Goboleedka IGAD, Dr. Workneh Gebeyeh. Wafdiga waxaa garoonka si diirran ugu soo dhaweeyay Wasiirka Arrimaha Dibadda Soomaaliya, Axmed Macalin Fiqi, iyo masuuliyiin kale oo ka tirsan dowladda.
Booqashada Dr. Workneh iyo wafdigiisa ayaa lagu wadaa inay muhiim u noqoto wada hadallo heer sare ah oo uu la yeelan doono Madaxweynaha Jamhuuriyadda Federaalka Soomaaliya, Xasan Sheekh Maxamuud, iyo madaxda kale ee dalka.
Kulammadaas ayaa diiradda lagu saari doonaa xoojinta iskaashiga gobolka, xaaladda amniga iyo siyaasadda Soomaaliya, iyo doorka IGAD ee dhexdhexaadinta iyo xal u helidda arrimaha ka taagan gobolka.
Waxaa la filayaa in shirka lagu soo bandhigi doono qorshayaal lagu hormarinayo wada shaqeynta Soomaaliya iyo dalalka xubnaha ka ah IGAD, gaar ahaan dhinacyada nabadgelyada, horumarinta dhaqaalaha, iyo xal u helidda khilaafaadka siyaasadeed ee gobolka.
Booqashada wafdigan ayaa sidoo kale looga gol leeyahay in la adkeeyo kaalinta IGAD ee gobolka iyo taageerada ay siinayaan Soomaaliya, xilligan ay dowladda Soomaaliya ku jirto dagaal ka dhan ah Al-Shabaab.
