Iyadoo la hadal-hayey inuu maanta lagu dhawaaqi doono Xukuumadda Cusub ee Federalka ayaa waxaa soo baxay inuu Dib-u-dhac ku yimid Magacaabistaasi.
Ilo-wareedyo ku dhowdhow Xafiiska Ra’isul-wasaare Xasan Cali Kheyre ayaa u xaqiijiyey Radio Dalsan inuu dib-u-dhacay qorshihii maanta lagu shaacin lahaa Xukuumadda cusub, lana filayo in lagu dhawaaqo Isbuuca soo socda.
Radio Dalsan ayaa soo ogaatay inuu RW Kheyre weli ku hawlan yahay La-tashiyadda uu la leeyahay Siyaasiyiinta iyo Dhaqanka Beelaha Soomaaliyeed, maadaama ay Beel kasta doonayso inay iska aragto Xukuumadda Cusub ee la soo dhisayo.
Warar aynu si Khaas ah u helnay ayaa sheegayo in Xukuumadda cusub ka koobnaan doonto ilaa 25-Wasiir, kuwaasi oo isugu jira Siyaasiyiin xilal hore ka soo qabtay Dowladihii hore iyo Wejiyo ku cusub Masraxa Siyaasadda.
RW Kheyre waxaa xilkaasi loo magacaabay bishii February 21-dii, iyadoo ay Xildhibaanadda ansixiyeen magacaabistaasi bishan March 1-dii.
Si ksataba ha ahaatee, RW Kheyre ayaa looga fadhiyaa inuu so omagacaabo Xukuumad Tito Yar, balse Tayo leh, si ay ula jaan-qaadaan Xaalladaha Cakiran ee Siyaasadda, isla markaana wax uga qabtaan Macluusha iyo Abaaraha Daran ee dalka ka jira, oo ay maalin kasta Muwaadiniin Soomaali ah u geeriyoodaan.
©Radio Dalsan
