Xafiiska Xeer ilaalinta dowlad Goboleedka Puntland ayaa sheegay inuu ka laabtay dacwadii ay kusoo oogi lahaayeen Xildhibaan Cawil Xasan Daad oo 26-kii bishii hore Su’aal adeg weydiiyay Madaxweynaha Puntland Saciid Cabdullaahi Deni.
Qoraal kasoo baxay Xafiiska Xeer ilaalinta Puntland ayaa lagu shaaciyay in sababta Dacawdaas looga laabtay tahay, kadib markii uu heshiis dhexmaray Golaha Xukuumadda maamulkaas iyo Xildhibaano ka tirsan Baarlamanka.
Dhinaca kale Madaxweynaha Puntland Saciid Cabdullaahi Deni ayaa sheegay inuu aqbalay dhambaal raali-gelin ah oo uga yimid Xildhibaan Cawil Xasan Daad, kaasi oo ay u keeneen Xildhibaano ka tirsan Puntland kana dalbadeen inuu iska Cafiyo lagana laabto dacwadii la gudbiyay, isagoona Deni arrintaas Aqbalay.
Xafiiska xeer ilaalinta Guud ee Puntland ayaa dhawaan Guddoonka Baarlamaanka Puntland u diray waraaq uu kaga Codsanayo in xasaanada laga qaado Xildhibaan Cawil Xasan Daad isla markaana ay ogolaadaan in lagu soo oogo dacwad ciqaab ah
Cawil Xasan Daad ayaa Su’aal la xiriirta dhanka amniga weydiiyay Madaxweyne Deni, taasi oo buuq ka dhex dhalisay fadhiga Baarlamaanka, iyadoona Madaxweyne Deni Su’aashaas si adeg uga Jawaabay, kadiba isaga oo careysan ka baxay Hoolka Baarlamaanka Puntland