Weerar gantaallo culus ah oo ay Iran saaka ku qaaday gudaha Israa’iil ayaa si weyn u dhaawacay xarunta cilmi-baarista ee Weizmann, iyadoo dab xooggan uu ka kacay gudaha shaybaarrada. Wargeyska New York Times ayaa ku warramay in xaruntan ay si xun u burburtay.
Ugu yaraan 4 qof ayaa ku dhintay waqooyiga Israa’iil, halka ku dhowaad 195 kalena ay ku dhaawacmeen gantaallo lagu garaacay bartamaha Tel Aviv. 35 qof ayaa weli la la’yahay iyadoo dhismooyin burburay ay dusha ka wada dhaceen dad badan.
Gantaallada Iran qaarkood ayaa si toos ah u dhaafay nidaamka difaaca Israa’iil, sida ay baahiyeen Al Jazeera iyo ilo kale, taas oo sare u qaaday cabsi laga qabo in dagaal ballaaran qarxo.
Israa’iil ayaa si deg deg ah u qaaday duqeymo ka dhan ah Iran iyo Yemen, iyadoo bartilmaameedsatay xaafado ay ku sugan yihiin madaxda Iran iyo goobo shidaal iyo keyd ah, sida ay sheegtay Wasaaradda Batroolka Iran. Sidoo kale, weerarro ayaa lagu qaaday madax sare oo Xuutiyiinta Yemen ka tirsan.
Madaxweyne Pezeshkian oo la hadlay Ra’iisul Wasaaraha Pakistan ayaa sheegay in haddii Israa’iil sii waddo weerarrada “jawaab adag oo aan la filayn” laga sugayo Iran.
Dhanka kale, Ra’iisul Wasaaraha Israa’iil Netanyahu ayaa sheegay in dalkiisu uu si toos ah u beegsanayo “bar-tilmaameedyada ugu muhiimsan ee barnaamijka nukliyeerka Iran,” isagoo ku hanjabay duqeymo dheeraad ah.
Mareykanka ayaa hadda shir deg-deg ah ku leh Pentagon, kadib codsi Israa’iil ka timid oo ah in diyaaradaha culus ee B-12 ay ka qayb qaataan weerarrada Iran. Iran ayaa uga digtay Mareykanka in uu ka joogo faragelinta tooska ah, haddii kale saldhigyadiisa Bariga Dhexe ay noqon doonaan bartilmaameedyo toos ah.
Xaaladda gobolka ayaa hadda isu beddeshay mid khatar u ah in dagaal weyn oo Bariga Dhexe ka qarxa uu salka dhigo, iyadoo dalal kale sida Lubnaan, Suuriya iyo Yemen laga cabsi qabo in ay si toos ah ugu lug yeeshaan.
