Webiga Shabelle ayaa saacadihii la soo dhaafay waxaa uu fatahaad ka sameeyay degaano hoostaga Magaalada Jowhar ee Caasimadda dowlad Goboleedka Hirshabeelle, kaas oo saameeyay Beeraleyda ku nool tuulooyinkaas.
Webiga ayaa fatahaada ka sameeyay tuulooyinka la isku yiraahdo Balcaano oo ka kooban 72 tuulo oo dhammaan hoostega magaalada Jowhar, iyad oo inta badan dadkii ku noolaa ay tuulooyinkaasi ay ka barakaceen.
Sidoo kale fatahaada webiga Shabeelle ayaa baabi’isay dhul beereed aad u ballaaran, isla markaana ay ku yaalleen dalagyo dhowr ah, sida ay warbaahinta u sheegeen qaar kamid ah dadka beeraleyda ah ee fatahaada ku waayay dalagooda.
Guddoomiyaha Maaamulka degmada Jowhar Cismaan Maxamed Mukhtaar ayaa sheegay in dhibaatooyin farabadan oo dhanka nolosha ah ay heystaan dadkii ku barakacay fataahada Webiga oo ay usii dheer tahay cudurasho ka dhashay biyaha.
Dowladda Federaalka iyo shacabka Soomaaliyeed ayuu Guddoomiyaha Jowhar ugu baaqay inay gargaar deg deg ah lasoo gaaraan dadka ku dhibaateysan deegaano hoostaga magaalada Jowhar oo ay saameeysay fatahaada uu sameeyay webiga.
Horay degmooyin iyo degaano ka tirsan Gobolka Hiiraan ayaa Webiga Shabeelle waxa uu ka sameeyay fatahaado, waxaana dadkii ugu badnaa ay barakaceen magaalada Baladweyne ee Xarunta Gobolkaas oo si daran uu ugu fatahay webiga.