Wasiirka Wasaaradda Gaashaandhigga Xukuumadda Federaalka Soomaaliya, Cabdulqaadir Maxamed Nuur, ayaa magaalada Baku ee caasimadda dalka Azerbajan kulan muhiim ah kula qaatay dhigiisa dalkaasi, Jenaraal Zakir Hasanov. Labada wasiir ayaa si qoto dheer uga wada hadlay sidii loo xoojin lahaa xiriirka labada dal ee dhanka difaaca, iyadoo diiradda la saaray iskaashiga labada dhinac ee la dagaallanka kooxaha argagixisada, gaar ahaan Al-Shabaab, oo weli khatar weyn ku haya amniga Soomaaliya iyo gobolka guud ahaan.
Kulanka ayaa kusoo aadaya xilli Soomaaliya ay muddooyinkii u dambeeyay heshiisyo difaac la saxiixatay dalal badan oo ay ka mid yihiin Turkiga iyo Imaaraadka Carabta, kuwaas oo qeyb ka ah dadaallada lagu xoojinayo awoodda difaaca dalka iyo sugidda amniga. Wasiirka Gaashaandhigga Soomaaliya ayaa sidoo kale carabka ku adkeeyay in iskaashiga caalamiga ah uu muhiim u yahay in Soomaaliya ay gaarto guulaha laga filayo ee ka dhanka ammaanka.
Xiisadda u dhexeysa Soomaaliya iyo Itoobiya ayaa iyaduna weli taagan, gaar ahaan arrimo la xiriira xuduudaha iyo dhaq-dhaqaaqyada milatari ee labada dal. Dowladda Federaalka Soomaaliya ayaa dhowaan ka digtay in xaaladaha gobolka ay u baahan yihiin in si taxaddar leh loola dhaqmo, iyadoo sidoo kale wada hadallo dhexdhexaadin ah laga dhex waday dhinacyada ku lug leh. Xiriirka Soomaaliya iyo Itoobiya, oo muddo dheer ahaa mid iskaashi iyo iska warqab, ayaa waayadan dambe wajahaya caqabado siyaasadeed iyo amni. Kulamada noocan oo kale ah ee wasiirrada difaaca ee Soomaaliya iyo dowladaha kale ayaa ah kuwo muhiim ah, si loo helo iskaashi buuxa oo dhinacyo badan leh, loona yareeyo khilaafaadka gobolka ka jira.
