Wasiirka Wasaaradda Qorsheynta Xukuumadda Federaalka ee xilgaarsiinta Jamaal Maxamed Xasan ayaa shaaciyay in Madaxweynaha dowlad Goboleedka Puntland Saciid Cabdullaahi Deni uu yahay Musharax u taagan xilka Madaxweynaha Somalia.
Wasiir Jamaal Maxamed oo bartiisa gaarka ah ee Twitter-ka Qoraal ku soo qoray ayaa waxaa uu sheegay ku sheegay in Madaxweyne Deni uu yahay Musharax Madaxweyne, uuna dib u dhigtay shaacinta Musharaxnimadiisa.
Wasiirka Wasaaradda Qorsheynta ayaa sababta Madaxweynaha Puntland uu dib ugu dhigtay ku dhawaaqista inuu Musharax yahay ku sheegay inay tahay inuu faragelin ku sameeyo doorashooyinka Baarlamaanka Federaalka ee ka dhacaya Puntland.
“Musharrax Madaxweyne maadaama uu yahay Saciid Cabdullaahi Deni waa in uu faraha kala baxaa arrimaha doorashada, kama aamusnaan karno.. wuxuu dib ugu dhigey ku dhawaaqista musharraxnimadiisa si uu saameyn ugu yeesho doorashooyinka ka dhacaya Puntland” ayuu yiri Wasiirka Qorsheynta.
Jamaal Maxamed Xasan ayaa Madaxweyne Saciid Cabdullaahi Deni ugu baaqay inuu faraha kala baxo Arrimaha doorashooyinka, isla markaana uu ka aamuso, isagoona sheegay in Musharaxiinta Baarlamaanka ay walaac ka muujiyeen Deni.
Maalmihii dambe ayaa waxaa soo baxayay warar sheegaya in Madaxweynaha Puntland uu u taagan xilka Madaxtinimada Soomaaliya, mana jiro weli wax war ah oo kasoo baxay Saciid Deni oo ku aadan inuu Musharax yahay.
