Wasiirka Warfaafinta, Dhaqanka iyo Wacyigelinta Somaliland Saleebaan Yuusuf Cali Koore oo dhawaan uu ku dhacay Cudurka halista ah ee Coronavirus ayaa shaaciyay inuu ka bogsaday.
Wasiir Saleebaan Koore oo qoraal soo saaray ayuu ku sheegay in baaritaankii ugu dambeeyay ee lagu sameeyay loogu wargeliyay inuu ka bogsaday Cudurka COVID-19, isla markaana xaaladiisa ay wanaagsan tahay.
Wasiirka ayaa tilmaamay in laba todobaad uu la jiifay COVID-19 oo ku dhacay, isagoo tan iyo markii laga helay Cudurka uu galay xaalad karantiil, uuna markii hore dareemay Madax xanuun farabadan, qando iyo xanuuno kale.
“Alxamdulilah baaritaan Caafimaadkii la igu sameeyey waxaa la ii cadayeey inan ka bogsaday Cudurka halista ah ee  COVID-19 (Negative)†ayuu ku yiri Qoraal uu soo saaray Wasiirka Warfaafinta Somaliland.
Saleebaan Yuusuf Cali ayaa la xaqiijiyay in tan iyo markii cudurka haleelay uu ka maqnaa shaqada Wasaaradda iyo goobaha ay madaxdu ku kulmaan, sida xafiisyada Madaxtooyada iyo Munaasabada Mamaulka.
Sidoo kale waxaa la sheegayaa in Cudurka ay ka bogsadeen qaar kamid ah Ilaalada Wasiirka Warfaafinta Somaliland oo horey ugu dhacay Cudurka, sida uu markii hore warbaahinta u sheegay Wasiir Koore.
