Wasiirka Arrimaha Dibadda iyo Iskaashiga Caalamiga, Mudane Danjire Axmed Ciise Cawad, ayaa shalay oo Talaado ahayd ku qaabilay Muqdisho Kuxigeenka Wakiilka Xoghayaha Guud ee Qaramada Midoobey u qaabilsan Arrimaha Soomaaliya ahna Sarkaal sare oo Q.M isla markaana ah Iskuduwaha arrimaha bani’aadannimada ee Howlgalka Kaalmaynta Qaramada Midoobay ee Soomaaliya (UNSOM), Mudane Adam Abdelmoula, oo dhowaantan Xoghayaha guud ee Qaramada Midoobey Mudane António Guterres u magacaabay xilkaasi.
Wasiir Cawad ayaa soo dhoweeyay mas’uulka cusub ee Qaramada Midoobey, isagoo carabka ku adkeeyay ballanqaadyada caalamiga ah ee Soomaaliya ay gashay oo ah in ay la shaqayso hey’adaha Qaramada Midoobey ee ka howlgala dalka si loo maareeyo, waxna looga qabto dhammaan xaaladaha bani’aadannimo, siyaasadeed iyo nabadgelyo, isagoo tilmaamay in loo istaago sidii loo caawin lahaa dadka ay fatahaaduhu saameeyeen.
