Wararka Idacada dalsan ee magaalada Muqdisho ay ka helayso gudaha Suuqa Bakaaraha ee magaalada Muqdisho ayaa sheegay in halkaasi ay ka dhacaday toogasho iyada oo faahfaahin ay kasoo baxayso.
Wararka ayaa sheegaya in kooxo hubaysan gudaha Suuqa Bakaaraha in ay dil ugu geysteen Askari ka tirsan ciidamada dowladda,waxaana dilkaas fulisay koox Baastoolado ku hubeysnaa.
Goobjoogayaal ayaa dalsan u sheegay in markiiba goobata ay soo gaareen ciidamo ka tirsan kuwa boliiska oo Meydka goobta ka qaaday isla markaana xiray muddo kooban isku socodka gaadiidka iyo dadka.
Kooxihii dilka geystay ayaa goobta iskaga baxsaday ilaa iyo haatana ma jirto cid sheegatay masuuliyadda dilkaas loo geystay Askarigaas ka tirsanaa ciidamada dowladda,waxaana dhacday dhowr jeer sidaan oo kale in Askar loogu dilay gudaha Suuqa Bakaaraha ee magaalada Muqdisho.
