Wasiir ka tirsan Koonfur Galbeed oo kusoo baxay Doorasho kursi oo ka dhacday Kismaayo

Wasiirka Gaadiidka Maamulka Koonfur Galbeed Soomaaliya ayaa goordhow ku guuleystay doorashada kursi ka tirsan Golaha Shacabka Baarlamaanka 11-aad ee dowladda, taasi oo Maanta ka dhacday Magaalada Kismaayo.

Doorashada kursiga uu kusoo baxay Wasiir Xasan Xuseen Maxamed (Eelaay) oo tirsigiisu ahaa #HOP126 ayaa waxaa Wasiirka kula tartamay Musharax Cabdiraxmaan Macalin Xuseen, waxaana doorashada kursigaas kusoo baxay Wasiir Eelaay.

Wasiirka Gaadiidka Koonfur Galbeed ayaa helay Codad gaaraya 74 Cod, halka Musharax Cabdiraxmaan Macalin uu isna helay 21 Cod, waxaana halaabay 5 Cod, sida uu ku dhawaaqay Natiijada, Guddoomiyaha Guddiga doorashada Jubaland SEIT Dr Siyaad Maxamed Mursal.

Doorashada kuraas kale oo laba ah ayaa haatan ka socota Magaalada Kismaayo ee Xarunta Gobolka Jubbada Hoose, waxaana doorashada goobjoog ka ah wafdi ka socda Guddiga doorashooyinka heer Federaal iyo kuwa Guddiga doorashooyinka Jubbaland.