Wararkii ugu dambeeyay Qarax Khasaaro geystay oo ka dhacay Muqdisho

Warar dheeraad ah ayaa kasoo baxaya Qarax Khasaaro geystay oo ka dhacay Magaalada Muqdisho gaar ahaan nawaaxiga Isgoyska Fagax dhinaca xiga Degmada Kaaraan ee Gobolka Banaadir.

Dad goobjoogayaal ah oo la hadlay Idaacada Dalsan ayaa waxaa ay u sheegeen in qaraxaas ahaa miino la geliyay laamiga dhinaciisa, ayna qaraxday xili uu gubay gaari nooca dagaalka oo ay la socdeen Askar ka tirsan Ciidanka dowladda oo halkaas socdaal ku marayay.

Ugu yaraan Afar ruux oo shacab ah oo xiligaas goobta ka Agdhawaa ayaa lagu soo waramayaa inuu dhaawac kasoo gaaray qaraxa, kuwaasi oo Deg deg ah loogula cararay Xarun Caafimaad oo ku taalla Muqdisho.

Ciidamo ka tirsan kuwa Booliska oo ku sugnaa meel aan sidaas ugu fogeyn Isgoyska Farax ayaa tegay goobta, iyagoo xiray halkaas, sidoo kalena sameeyay baaritaano ku aadan qaraxii dhacay, dibna wadada u furay.

Sawirro laga soo qaaday goobta uu qaraxu dhacay laguna faafiyay baraha Bulshada ayaa lagu arkayay Mooto Bajaajyo ku burburay qaraxaas iyo Guri ku yaalla halkaas

Weli ma jiro wax war ah oo kasoo baxay laamaha amniga dowladda Federalka oo ku aadan qaraxii ka dhacay Magaalada Muqdisho gaar ahaan Isgoyska Fagax dhinaca xiga Degmada Kaaran.