Wafuud Shisheeye oo lagu casuumay Caleema-saarka Madaxweynaha cusub ee dalka Iran

Madaxweynaha la doortay ee Iran, Ibrahim Ra’isi ayaa la filayaa in xilkasi loo caleemo-saaro bishan 5-da, iyadoo lagu casuumay 115 Saraakiil shisheeye oo ka kala socda 73 dal.

Wafuud shisheeye oo ay ka mid yihiin 10 Madaxweyne, 20 Guddoomiye Barlamaan, 11 Wasiiro Arrimo Dibadeed, 10 Wasiiro kale, Ergooyin Khaas ah, Guddoomiye-ku-xigeeno Barlamaan iyo Ergooyin Barlamaan ayaa lagu casuumay Munaasabadda Caleema-saarka oo Khamiista ee soo socota lagu qaban doono caasimadda dalkaasi ee Tehran.

Wakaalladda Wararka ee Fars news Agency waxay sheegtay in sidoo kale la casuumay Madax iyo Saraakiil ka kala socda 11 Ururo Caalami iyo kuwo Gobaleed, oo ay ka mid yihiin QM, Ururka Midowga Europe, Ururka OPEC iyo kuwo kale.

Madaxweynaha cusub ee Iran, Ibraahim Ra’iisi waxa uu ku guuleysatay Doorashadii Madaxtinimada ee dhacday bishii June 18-dii, isagoo helay 62% oo u dhiganta ku-dhawaad 18 million oo Cod.