Shil Khasaaro geystay oo ka dhacay Magaalada Muqdisho

Faah faahino dheeraad ah ayaa kasoo baxaya Shil Khasaaro geystay gelinkii dambe ee Maanta ka dhaca Xaafad ka tirsan Degmada Yaaqshiid ee Gobolkaan Banaadir.

Dad goobjoogayaal ah oo la hadlay Idaacadda Dalsan ayaa waxaa ay u sheegeen in Shilkaas uu ka dhacay Xaafada Kooka-koola ee Yaaqshiid, waxaana uu ka dambeeyay, kadib markii ay isku dhaceen Mooto Bajaaj iyo gaari nooca raaxada ah.

Sidoo kale dadka naga hadlay ayaa waxaa inoo sheegeen in Mooto Bajaajta ay saarnaayeen laba wiil oo dhalinyaro ahaa, isla markaana uu ku dhacay gaariga raaxada ahaa oo la tilmaamay inuu socday xawaare sare.

Laba wiil ee dhalinyarada ayaa goobta ku geeriyooday, waxaana dhaawac fudud uu soo gaaray Darawalkii waday gaariga raaxada ah, kaasi oo loo qaaday Xarun Caafimaad, waxaana gurmad u sameeyay dad shacab ah oo goobta ka Agdhawaa.

Magaalada Muqdisho ayaa waxaa xiliyada qaarkood ka dhaca shilal geysta Khasaarooyin kala duwan, kuwaasi oo inta badan ka dhasha gaadiidka noocyadiisa kala duwan oo Waddooyinka Magaalada loogu dhex-wada si xawaare sare ah.