Sheekh Shariif oo Caawa kulan la yeeshay Cabdi Xaashi iyo Mahdi Guuleed

Madaxweynihii hore ee dalka Soomaaliya ahna Guddoomiyaha Midowga Murashaxiinta Madaxweynaha Soomaaliya Shariif Sh Axmed ayaa la kulmay Guddoomiyaha Aqalka sare ee dalka Senator Cabdi Xaashi Cabdullaahi iyo Ra’isulwasaare ku-xigeenka XFS Mahdi Maxamed Guuleed ( Khadar ).

Madaxweyne Shariif ayaa ku  bogaadiyay Guddoomiye Cabdi Xaashi iyo Ra’iisul Wasaare ku-xigeenka Mahdi Guuleed sidii wacneed ee ay u hoggaamiyeen Doorashadii aqalka sare ee gobolada Waqooyi.

“Waxaan markale u hambalyaynayaa 11-ka xubnood ee loo doortay aqalka sare in ay ku matalaan gobolada Waqooyi ee dalka, waxaa xusid mudan doorkii hoggaamineed ee guddoomiye Cabdi Xaashi iyo Ra’isulwasaare ku xigeenka Mudane Mahdi iyo tanaasulkii ay muujiyeen, sida hufan ee furan ee loogu tartamay kuraasta” ayuu yiri Madaxweyne Shariif Sh Axmed.

Sheekh Shariif ayaa tilmaamay in Doorashadii Aqalka Sare ee Gobolada Waqooyi ay ka muuqatay biseyl, wada shaqayn iyo is aaminaad labada hoggaamiye, isagoo rajeeyay in sidaa oo kale u qabsoonto doorashada Golaha Shacabka.

“Waxaa lagama marmaan ah in si dhaqsi loo galo doorashada Golaha shacabka, xubnaha Sanatarada ka harayna ay dhaqsi ah u soo dhameystiraan dowlad goboleedyada” ayuu kusoo gaba-gabeeyay hadalkiisa Sheekh Shariif Sh Axmed.