RW Rooble oo ka horyimid Isbedelka uu sameeyay Farmaajo una jeediyay Eed Culus

Ra’iisul Wasaaraha Xukuumadda xilgaarsiinta Maxamed Xuseen Rooble ayaa Jawaab ka bixiyay Wareegtadii magacaabista ee uu xalay uu soo saaray Madaxweyne Farmaajo, kuna magacaabay Mas’uuliyiin uu kamid yahay Agaasimihii Hay’adda NISA Fahad Yaasiin oo xilka qaadis lagu sameeyay.

War-saxaafadeed uu soo saaray Aadaanka hore ee Salaadii Subax ee saakay Ra’iisul Wasaare Rooble ayuu marka hore ku soo dhaweeyay Aqbalaadda Madaxwaynaha ee Shaqo ka joojintii Agaasimihii Hore ee NISA Fahad Yaasiin ee uu xilka ka qaaday.

Rooble ayaa ayaa waxaa uu faray Agaasimaha Guud ee KMG ah ee NISA Sarreeya Guud Bashiir Maxed Jaamac in uu si deg deg ah u bilaabo shaqadiisa, sidoo kale Saraakiisha Hay’adda Sirdoonka iyo Nabadsugidda Qaranka ku amray in ay si buuxda ula shaqeeyaan Agaasimaha Cusub ee Hay’adda Bashiir Goobe.

Ra’iisul Wasaaruhu ayaa umadda Soomaaliyeed u caddeeyay in Qoraalada kasoo baxay Xafiiska F06-09-2021 iyo 07-09-2021 ay muujinayaan in uu wali daba socdo Masuuliyadihii Doorashooyinka iyo Amniga ee uu ku wareejiyay Ra’iisulwasaaraha.

Waxaa kale oo uu Ra’iisul Wasaare Rooble ku eedeeyay Madaxweyne Farmaajo talaabooyinka uu qaaday, isagoona ku tilmaamay kuwo lagu carqaladaynayo in si dhammaystiran looga gungaaro kiiska Ikraam Tahliil Faarax oo horay hay’adaha Cadaaladda iyo sharciga looga hor-istaagay in ay baaris buuxda ku sameeyaan Kiiskaas.

“Ra’iisulwasaaruhu wuxuu u arkaa wax laga xumaado in Xuquuqda Muwaadin Soomalaiyeed la siyaasadeeyo taas oo ah dhaqan halis ku ah hannaanka dowladeed ee Dalka waana in ay ka waantawdo cid kasta oo ku fikiraysa arrinkaas. Ra’iisulwasaarahu wuxuu markale ku adkaynayaa Xeer-ilaalinta iyo Maxkmadda Ciidammada Qalabka Sida in ay dardargaliyaan hawlaha Baarista kiiska Ikraam Tahliil Faarax deg degna u hor geeyaan maxkamadda awoodda u leh” ayaa  lagu yiri Qoraalka kasoo baxay Xafiiska Rooble.

Ra’iisul Wasaaraha ayaa faray dhammaan taliyayaasha Ciidamada Qalabka sida in ay si buuxda ugu gacansiiyaan Xeer-ilaalinta Ciidamada iyo Hay’adaha Sharcigu in ay gutaan waajibadka ka saaran arrintaan, isagoona ku adkeeyay inay ilaaliyaan amniga iyo xasilloonida guud ee dalka, Xuquuqda Muwaadiniinta, isla markaana ka feejignaadaan tilaabo kasta oo wax u dhimi karta  Xorriyaadka iyo xuquuqaha aasaasiga ah ee dadwaynaha Soomaaliyeed.

Ra’iisul Wasaaraha ayaa Shacabka Soomaliyeed uga baaqay in ay gacan ka gaystaan sidii ay caddaalad u heli lahayd  Ikraam Tahliil Faarax.

Ugu danbayn, Ra’iisul wasaaruhu isaga oo ku hadlaya magaca Golaha wadatashiga Qaranka wuxuu shacabka Soomaaliyeed iyo Beesha Caalamka u xaqiijinayaa in la dardargalin doono arrimaha Doorashooyinka dalka oo si wanaagsan u socda, wuxuuna ku baaqayaa in loo midoobo sidii ay si nabadgalyo ah ugu dhammaan lahayd doorashadu isla markaana looga hor leexin lahaa wax kasta oo caqabad ku ah.