Madaxweynaha Kenya oo mar kale Maanta kulan la yeelanaya Muuse Biixi

Madaxweynaha Somaliland Muuse Biixi Cabdi ayaa Maanta tallaado ah mar kale Magaalada Nairobi ee Caasimadda dalka Kenya kulan kula qaadan doona Madaxweynaha dalkaas Uhuru Kenyatta.

Kulanka oo noqon doono mid Albaabada u xiran yihiin ayaa waxaa looga hadli doonaa arrimo kaal duwan oo ay kamid yihiin xoojinta xiriirka ka dhexeeya Somaliland iyo Kenya kuna saleysan dhinacyo kala duwan.

Sidoo kale kulanka dhexmaraya Muuse Biixi iyo Uhuru Kenyatta ayaa waxaa Somaliland ay ku sheegtay in lagu dhameeystirayo qodobo dhowr ah oo  shalay labada Madaxweyne ka wada hadleen, iyadoona la filayo inay heshiis gaaraan.

“Labada Madaxweyne waxay kaga wada hadleen kulankooda qodobo dhowr ah oo u badan danaha Kenya iyo Somaliland sidii loo xoojin lahaa” ayaa lagu yiri Qoraal shalay  kasoo baxay Madaxtooyada Somaliland.

Kulanka labaad ee dhexmaraya Madaxweyne Uhuru Kenyatta iyo Muuse Biixi Cabdi ayaa kusoo beegmaya, iyadoo dowladda Federaalka Soomaaliya ay xalay xiriirka si rasmi ah ugu jartay dowladda Kenya.

Kenya ayaa lagu eedeeyay inay muddooyinkii ugu dambeeyay fara-gelin siyaasadeed ku heysay Arrimaha siyaasadda dalka iyo Madaxbanaanida Soomaaliya, taasina ay keentay inay Go’aan qaadato dowladda oo xiriirka loogu jaray dowladdaas.

Dowladda Soomaliya ayaa habeen horey Dacwad ka dhan ah Kenya u gudbisay Urur Goboleedka IGAD, iyadoona Dacwadaasna shir deg deg laga yeelanayo, kaasi oo 20-ka bishaan December ka dhici doona dalka Jabuuti.