Maamulka Isbitaalka Madiina oo ka hadlay Khasaaraha Qaraxii Maanta

Waxaa saakay duleedka Magaalada Muqdisho gaar ahaan inta u dhexeeysa deegaanada Lafoole iyo Xaawo ka dhacay qarax xoogan oo geysay Khasaaro isugu jira dhimasho iyo dhaawac soo saaray dad badan oo shacab ah.

Qaraxaas oo ahaa miino nooca dhulka lagu aaso ah ayaa waxaa uu haleelay Gaari nooca dadweynaha raacaan ee loo yaqaano Hoomey-da xili uu marayay inta u dhexeeysa Lafoole iyo Xaawo Cabdi, waxaana saarnaa 13 qof oo isku qoys ahaa.

Agaasimaha Isbitaalka Madiina Dr. Maxamed Yuusuf oo Goordhow la hadlay warbaahinta ayaa waxaa uu sheegay in Isbitaalka madiina ee Magaalada Muqdisho la keenay dadkii waxyeelada kasoo gaartay qaraxii ka dhacay duleedka Muqdisho.

Agaasime Maxamed ayaa waxaa uu sheegay in 6 qof ay ku dhinteen qaraxaas, halka 7 of kalena uu soo gaaray dhaawac, isagoo xusay in dadka dhaawacmay ah ay ku jiraa 2 ruux oo halis ah.

Isaga oo sii hadlaayay Agaasimaha ayuu tilmaamay in dadka dhaawacmay haatan dhaqaatiirta Isbitaalka Madiina ee Magaalada Muqdisho ay la tacaalayaan xaaladooda Caafimaad, wuxuuna Alle uga baryay Caafimaad deg deg ah.

Weli ma jirto cid sheegatay Mas’uuliyada qaraxaas Khasaaraha geystay ee saakay duleedka Muqdisho, sidoo kalena ma jiro wax war ah oo kasoo baxay dowladda Federaalka Soomaaliya oo ku aadan Qaraxaas dhacay.