Ugu yaraan seddex qof ayaa lagu dilay laba kalana waa lagu dhaawacay dagaal tuulada Garbo-Ciise ku dhex maray Soomaalida iyo Cafarta, sida ay sheegayaan wararka aan halkaas ka heleyno.
Qaar ka mid ah odayaasha deegaanka Garbo ciise oo la hadlay laanta Afka Soomaaliga ee BBC-ka ayaa waxaa ay u sheegeen in dagaalka oo shalay billowday inuu ilaa iyo xalay socday.
Tuulada Garbo-Ciise oo hos timaadda degmada Afdam ee gobolka Siti ee deegaanka Soomaalida labadi sano ee ugu dambeeyey dagaal ay dad badan ku dhinteen ayaa ku dhex marayey Soomaalida iyo Cafarta.
BBC waxay isku dayday iney xog dheeraad ah ka hesho hogaanka nabadgalyada deegaanka soomaalida iyo xafiiska warfaafinta balse uma suuragelin.
Mid ka mid ah odayaasha Deegaanka ayaa BBC uga warramay sida ay wax u dhaceen, isagoo sheegay in dagaalka uu ahaa mid xoogan oo socday saacado dhowr ah, uuna bilowday shalay.