Khasaaraha ka dhashay Askari qoyskiisa ku Qarxiyay Muqdisho oo kordhay

Waxaa sii kordhaya khasaaraha ka dhashay Askari ka tirsan dowladda Federaalka Soomaaliya oo xalay Bam ku qarxiyay qoyskiisa, xili ay ku sugnaayen Gurigooda ku yaalla xaafad ka tirsan degmada Warta-nabadda ee Gobolka Banaadir.

Goobjoogayaal la hadlay Idaacadda Dalsan ayaa u sheegay in Askariga markii horey isaga oo sarqaasan uu galay guriga, kadibna uu muran xoogan soo kala dhex-galay isaga iyo qoyskiisa oo ku sugnaa hal  Qol, wuxuuna kadib ku qarxiyay Bam gacmeed uu watay.

Khasaaro isugu jira dhimasho iyo dhaawac ayaa ka dhashay qaraxaas oo soo gaaray qoyska Askariga ka tirsan Ciidanka dowladda oo deganaa Guri ku yaalla xaafadda Cali Kamiin ah ee degmada Warta-nabadda ee Gobolka.

Ugu yaraan 4 ruux oo ay ku jirtay hooyada dhashay Askariga falkaas geystay ayaa ku geeriyooday goobta uuna kamid ahaa wiil uu isaga dhalay, waxaana qaraxa ku dhaawacmay 9 qof oo isugu jiray wallaalihiis, adeerkiis iyo xubno kale oo qoyska ka tirsanaa.

Dad deris lahaa qoyska ay dhibaatada gaartay ayaa tegay Guriga, iyagoona gurmad xoogan u sameeyay dadkii waxyeelada kasoo gaartay qaraxaas, isla markaana waxaa dhaawacyada la geeyay Xarun Caafimaad oo ku taalla Muqdisho.

Wararka ayaa intaas kusii daraya in Askariga ka tirsan Ciidanka dowladda ee falkaas geystay oo lagu magacaabo Nuuraaye uu ku dhaawacmay qaraxii uu geystay, waxaana gacanta ku dhigay laamaha amniga isaga oo dhaawac ah.

Dhacdadaan ayaa xanuun badan ku reebtay dadkii deriska la ahaa qoyska ay dhibaatada gaartay, isla markaana dadka deegaanka xaafadda Cali Kamiin warbaahinta la hadlay  ayaa u sheegay in falkaas ay aad uga naxeen markii uu dhacay.

Askari ka tirsnaa Ciidanka dowladda Federaalka ayaa horey sidaan oo kale weerar loo adeegsaday rasaas xoogan uu ku furay qoys uu gabar ka qabay, kuwaasi deganaa duleedka Muqdisho, waxaana weerarkaas ka dhashay khasaaro dhimasho iyo dhaawac.