KGS oo shaacisay in berri la qabanayo Doorashada kuraas uu ku jiro midkii Jawaari ee la hakiyey

Guddiga hirgelinta doorashada Maamulka Koonfur Galbeed Soomaaliya ayaa shaaciyey qabashada doorashada Afar kamid ah kuraasta Golaha Shacabka Baarlamaanka 11-aad ee dowladda Federaalka Soomaaliya.

Guddiga doorashada Koonfur Galbeed ayaa Qoraal ay soo saareen waxaa ay ku sheegeen in maalinta berri oo Axad ah la qabanayo doorashada kuraasta tirsigoodu kala yihiin HOP103, HOP198, HOP014 iyo HOP024.

Afarta kursi ee la shaaciyay in doorashadooda la qabanayo berrito ayaa waxaa ku jira kursiga tirsigiisu yahay HOP103 oo ay hakiyeen doorashadiisa, Guddiga doorashada heer Federaal, kadib markii cabasho laga soo gudbiyey hanaanka loo marayo kursigaas.

Guddoomiyihii hore ee Golaha Shacabka Maxamed Sheekh Cismaan Jawaari ayaa cabasho ka gudbiyey kursiga HOP103 oo uu afartii sanno ee lasoo dhaafay ku fadhiyey, waxaana Guddiga doorashada KGS ay sheegeen in la qabanayo doorashadiisa kursiga.

Guddiga doorashada Koonfur Galbeed ayaa u muuqda kuwo dhegaha ka fureystay go’aankii Guddiga doorashada Federaaal ee FEIT ay ku hakiyeen in la qabto doorashada kursigaas oo cabasho ka gudbiyay Guddoomiye Jawaari.

Hoos ka Akhriso Qoraalka Guddiga doorashada Koonfur Galbeed