Taliyaha Boliska Gobalka Mombasa ee dalka Kenya, Nelson Marwa ayaa sheegay in gacanta lagu dhigay Labo nin oo lagu tuhunsan yahay inay xiriir la leeyihiin Xarakadda Alshabaab iyo hub ka kireyn jireen Kooxaha dilalka ka geysta Mombasa.
Eedeysanaha Koowaad oo magaciisa lagu sheegay Salim Ismail ayaa waxa lagu qabtay 6 Bistoolad, waxaana lagu sameeyey hub-ka-dhigis.
Eedeysanaha Labaad waxay Boliska ku sheegeen Swaleh Hamisi, kaasi oo lagu eedeynayo inuu ka dambeeyey falal lagu dilay rag Boliska u geyn jirey Wararka la xiriira Shaqsiyaadka taabacsan Alshabaab ee ku sugan Mombasa.
Warbixinta Boliska waxaa kaloo lagu sheegay inay rumeysan inay ragaasi ka mid yihiin dadkii ku biiray Alshabaab, ee sida dhuumaalaysiga dib ugu soo laabtay Kenya.
Dhinaca kale, Boliska waxay adkeeyeen Ammaanka Mombasa, iyadoo la filayo inuu Badaariga ugu weyn Diinta Masiixiga, Pope Francis bishan November 25-da ilaa 27-da booqasho ku tago dalka Kenya.
© Radio Dalsan
