Taliska Booliska dowlad Goboleedka Hirshabeelle ayaa Caawa Amaro cusub kasoo saaray amniga doorashooyinka Aqalka Sare ee Baarlamaanka ee ka dhacaya Magaalada Jowhar ee Caasimadda Maamulkaas.
Afhayeenka Booliska Hirshabeelle Gaashaanle Diini Rooble Axmed oo warbaahinta la hadlay ayaa waxaa uu sheegay in la mamnuucay gaadiidka iyo hubka sida sharci darrada loogu dhex wato Magaalada Jowhar.
Afhayeen Gaashaanle Diini Rooble ayaa sheegay in gudaha Caasimadda Maamulka uusan dhex lugeyn karin Askari hubeysan oo aan ka tirsaneyn Ciidanka loo xilsaaray sugida amniga, waxaana Musharaxiinta la faray inay xakameeyaan Ilaaladooda la socda.
Taliska Booliska ayaa laamaha amniga ku amray in aysan xabbad micno darro ah ridi karin, sidoo kalena aan marnaba la ogeyn in gaadiid iyo hub sharcin darro ah lagu dhex heysto Magaalada Jowhar.
Ugu dambeyn Taliska Booliska Hirshabeelle ayaa shacabka Caasimadda maamulka faray inay si dhowr ula shaqeeyaan laamaha amniga qeybahooda kala duwan, isla markaana ay kusoo wargeliyaan wax kasta oo amniga lid ku ah.
Magaalada Jowhar ayaa waxaa lagu wadaa in maalmaha soo socda ay ka dhacdo doorashada Xildhibaanada Aqalka Sare ee Baarlamaanka, kadib markii Maanta Madaxweyne Cali Guudlaawe uu soo saaray liiska Musharaxiinta.
