Guddoomiyaha Maxkamadda Ciidamada Qalabka Sida G/Sare Xasan Cali Nuur Shuute ayaa booqday Ciidamo ka tirsan kuwa Booliska oo dowladda Federaalka ay geysay wadada isku xirta Muqdisho iyo deegaanka Jaziira ee Shabeellaha Hoose oo maalmihii la soo dhaafay ay ku dagaalameen rag Maleeshiyaad ah.
Maleeshiyaadka hubeysan ee ku dagaalamayay halkaas ayaa waxaa la sheegay inay ahaayeen kuwo dadka shacabka ah ee u Dalxiiska tega deegaanka Jaziira iyo Abaay dhaxan dhac baahsan u geysan jiray, iyadoo haatan halkaas lagala wareegay.
Guddoomiye Shuute oo la hadlay warbaahinta ayaa waxaa uu sheegay in Maxkamadda iyo dowladda la socotay dhibaatooyinkii dadka loo geystay deegaanka Jaziira, Abaay dhaxan iyo deegaano kale oo ku teedsan, Balse arrintaas laga Jawaabay.
Sidoo kale Guddoomiye Shuute ayaa waxaa sheegay in la xiray saddex kamid ahm ragii dhibaatada ka geystay deegaanadaas, wuxuuna Ciidanka Booliska ku amray inay soo qabtaan kuwo kale, ayna howlgal baaritaano ah ka sameeyaan Xaafadaha deegaanada, isla markaana dadkaas la horgeyn doono Cadaaladda.
Isaga oo sii hadlaayay Guddoomiyaha Maxkamadda Ciidamada ayuu Ciidanka Booliska ee la geeyay Jaziira iyo Abaay dhaxan kula dardarmaaray inay gutaan wajibaadkooda shaqo, ayna ka fogaan Israsaaseynta dhexmarta Ciidamada ka wada tirsan dowladda.
Ugu dambeyn G/Sare Xasan Cali Nuur Shuute ayaa dadka deegaanada la geeyay Ciidamada Booliska ugu baaqay inay la shaqeeyaan laamaha amniga, si loo soo wada qabto dadkii dhibaatooyinka u geystay dadka shacabka ah ee u Dalxiiska tega deegaanka Jaziira iyo Abaay dhaxan.
