Goobo ganacsi oo ay leeyihiin Soomaali oo la xiray iyo sababta keentay  

5 Dukaan oo Cusub oo dhawaan Ganacsato Soomaali ah ay ka furtenn deegaanka Tsakane ee hoostega degmada Ekurhuleni ee Magaalada Johannesburg ee gobolka Gauteng ee dalka Koonfur Afrika ayaa la xiray, kadib markii ay diideen inay bixiyaan lacago lagu soo rogay.

Muddo bil laga joogo, dagaal rasaas la isku adeegsaday ayaa la sheegay inuu ka dhacay dukaan cusub oo ay Soomaalidu ka furatay waddada lagu magacaabo Malandela, in kastoo is rasaaseynta dhexmartay dadka deegaanka iyo Ganacsatadii laheyd dukaanka aysan geysan wax khasaaro ah.

Dadka deegaanka Tsakane ayaa xili hore kulan ay yeesheen waxay ku go’aansadeen in aan la ogolaan karin dukaanno dheeri ah oo ajaanibta ay deegaankoda ka furtaan madaama deegaanka uu  markii hore la ciir ciirayay ganacsiga ajaanibta oo wado walba ku yaala

Rashiid Cabdullaahi oo ah kamid ah milkiilayashii Dukaamada laga xiray ayaa sheegay in isaga iyo milkiilaha guriga uu dukaanka ka furtay loo hanjabay dhowr jeer, wuxuuna sheegay in qaar ka mid ah dadka deegaanka Tsakane ay u yimaadeen, isla markaana  ay weydiyeen in uu bixiyo lacag dhan R1,500 si dukaankiisu ugu sii furnaado.

Ugu dambeyn Rashiid ayaa tilmaamay in uu wali la tacaalayo dhibaatadii ka soo gaartay boob iyo gubida loo geeystay dukaan uu ku lahaa Gobolka Limpopo, isla markaana uusan awood u laheyn xiligaan uu bixin lacagta lagu soo rogay.

Dalka Koonfur Afrika ayaa goobo ganacsi oo badan ku leh Muwaadiniin Soomaaliyeed oo xiliyada qaarkood halkaas dilal kala duwan iyo goobo baahsan loogu geysto, mana jirto cid arrintaas xil-saartay sidii wax looga qaban lahaa.