Faah faahin kasoo baxeysa Shil khasaaro dhaliyey oo ka dhacay Somaliland

Wararka aan ka heleyno degmada Sheekh ee Gobolka Saaxil ee Maamulka Somaliland ayaa waxaa ay sheegayaan in halkaas arroornimadii hore ee saaka uu ka dhacay Shil gaari, kadib markii uu gaari meel buur ah kala dhacay dad shacab ah.

Gaari nooca Bus ah oo ku socday xawaare sare oo ay saarnaayeen dad rakaab ah ayaa mar qura ka dhacay buur ku taalla degmada Sheekh, isla markaana waxaa gebi ahaan rogmaday gaariga ay saarnaayeen dadka, kaasi oo kusii jeeday Magaalada Burco.

Inta la xaqiiiyey 11 qof ayaa ku dhaawacmay shilka ka dhacay degmada Sheekh, waxaana dadkaas gurmad u sameeyay dad goobta si dhaqsi ah u gaaray, dhaawacyada ayaa waxaa la gaarsiiyey Isbitaalka Magaalada Burco, si looghu daaweeyo.

Somaliland ayaa waxaa maalmihii dambe kusoo batay shilalka khasaaraha kala duwan dhaliya, maalmo kahor ayey aheyd markii gudaha Magaalada Hargeysa uu ka dhacay shil gaari oo ay ku dhaawacmeen laba ruux, kadib markii gaari nooca xamuulka uu fariis goostay guri ku yaalla halkaas.