Doorashada kuraas hor leh oo Maanta lagu qabanayo Magaalada Garoowe

Doorashada afar kamid ah kuraasta Golaha Shacabka ee Baarlamaanka 11-aad ee dowladda Federaalka ayaa Maanta lagu qabanayaa Magaalada Garoowe ee Xarunta Gobolka Nugaal ahna Caasimadda Puntland.

Guddiga doorashada Puntland ayaa shahaado siiyay Musharaxiin ay u diiwaan-geliyeen tartanka kuraasta doorashadoodu Maanta ka dhaceyso xerada 54-aad ee Garoowe, taasi oo saacadaha soo socda si toos ah u bilaabaneysa.

Kursiga tirsigiisu yahay HOP232 ayaa waxaa ku tartamaya Musharaxiinta Farwosa Cismaan Cigaal iyo Saciido Faarax Warsame, halka kursiga HOP128 oo ay isku soo sharaxeen Maxamed Faarax Cali iyo Maxamed Cabdiraxmaan Axmed Xayle.

Waxaa kaloo kursiga HOP223 isku soo sharaxay oo ku tartamaya laba Musharax oo kala ah Xirsi Jaamac Gaani iyo Saciid Maxamed Warsame, iyada oo kursiga HOP#144 ku loolami doonaan Caasha Axmed Maxamed iyo Cabdiqafaar Cilmi Xaange.

Maalmo kahor ayey aheyd markii doorashada kuraasta ugu horreeysay ee Golaha Shacabka Baarlamaanka 11-aad ee dowladda Federaalka lagu qabtay Magaalada Garoowe ee Caasimadda Maamulka Puntland.