Ciidanka Dowladda oo howlgal ka sameeyay Qeybo kamid ah Gobolka Hiiraan

Ciidanka dowladda Federaalka gaar ahaan qeybta 27-aad ayaa saacadihii lasoo dhaafay waxaa ay howlgalo saacado qaatay ka sameeyeen gudaha degmada Buulo-burte iyo deegaanada hoostega ee Gobolka Hiiraan.

Saraakiisha hoggaamineysay howlgalka oo la hadlay warbaahinta ayaa u sheegay in Ujeedka howlgalka Ciidamada ay ka sameeyeen Buulo-burte uu yahay mid lagu xaqiijinayo ammaanka degmadaas oo mararka qaarkood ay ka dhacaan falal amni darro.

Kusimaha Taliyaha Ciidanka Xoogga qeybta 27-aad Xasan Maxamed ayaa shacabka Buulo-burte ka dalbaday inay wadashaqeyn la yeeshaan laamaha amniga, si looga hortego wax kasta oo amni darro keeni kara.

Sidoo kale Kusimaha Taliyaha ayaa sheegay in inta uu socday howlgalka Ciidamada aysan wax iska caabin ah kala kulmin dagaalamayaasha Al-shabaab, isla markaana howlgalka si caadi ah kusoo dhammaaday, isagoona xusay inay sii wadi doonaan howlgalka ka dhan ah Al-shabaab.

Ciidanka dowladda qeybta 27-aad iyo kuwa Midowga Afrika ee AMISOM ayaa maalmo kahor waxaa ay howlgalo ka dhan ah Al-shabaab ay ka fuliyeen degaano hoostega Magaalada Baladweyne ee Xarunta Gobolka Hiiraan, iyagoona kula wareegay degaano hor leh.