Ciidamo ka kala tirsan Itoobiya iyo Tigree-ga oo ku dagaalamay Hiiraan

Warar dheeraad ah ayaa kasoo baxaya dagaal ka dhacay deegaanka Halgan ee Gobolka Hiiraan, kaasi oo u dhexeeyay Ciidamo ka tirsan AMSIOM gaar ahaan kuwa ka socda dalka Itoobiya ee ku sugan halkaas.

Dagaalkaan ayaa ka dambeeyay, kadib markii Saraakiil iyo Ciidamo ka tirsan kuwo Tigree-ga la isku dayay in hub ka dhigis lagu sameeyo, kuwaasi oo iskula sugan Saldhiga Ciidamada Itoobiya ee Halgan.

Dadka deegaanka ayaa ku warramay in Saraakiisha Tigree-ga ay iska diideen tallaabadii lagu doonayay in Ciidanka Itoobiya uga dhigaan hubka, sidaasina uu ku bilowday dagaalka oo socday muddo lana maqlay dhawaaqa rasaas xoogan.

Wararka ayaa intaas kusii daraya in Ciidamada Itoobiya ee uu dagaalka dhexmaray ayaa weli isku hor-fadhiya meel ku dhow Saldhiga Ciidankaas ay ku leeyihiin deegaanka Halgan ee Gobolka Hiiraan.

Ilaa iyo hadda lama oga khasaaraha ka dhashay dagaalkaas dhacay, waxaana adeg in xog laga helo khasaaraha, maadaama Itoobiya aysan ogoleyn in dadka deegaanka iyo xubno kalena ay goobta ka agdhawaan.