Barnaamij Soo Saare ka tirsanaa Idaacadda Arrimaha Bani’aadanimada oo noqday Guddoomiyaha Guddiga Doorashooyinka Qaranka

Guddiga Doorashooyinka oo ay magacaabay dowladda Federaalka Soomaaliya ayaa Maanta oo sabti Magaalada Muqdisho ku doortay Guddoomiyeyaal, kadib kulan ay yeesheen.

Guddigaan oo ah kuwo lagu muran yahay ayaa Guddoomiye u doortay inuu noqdo Maxamed Xasan Cirro oo helay 17 Cod, waxaana xilka Guddoomiyaha Guddiga Doorashooyinka heer Federaal Maxamed kula tartamay Musharax Liibaan Abuukar.

Musharax Liibaan ayaa helay Codad gaaraya ilaa iyo 3 Cod, waxaana coddeeyay 20 xubnood oo kamid ah Guddiyada Doorashooyinka ee uu kal horey magacaabay Ra’iisul Wasaaraha Xukuumadda Maxamed Xuseen Rooble.

Sidoo kale Guddiyada Doorashooyinka ayaa Mowliid Mataan u doortay inuu noqdo ku-xigeenka Guddiga Doorashooyinka Soomaaliya, isla markaana waxaa xilkaas kula tartamay Musharax Yuusuf Maxamed Kheyre.

Musharaxiinta u taagan qabashada xilka Madaxweynaha ayaa siweyn uga soo horjeeda Guddigaan oo ku xareysan Hotel ku dhex yaalla Garoonka diyaaradaha Aadan Cadde ee Magaalada Muqdisho, iyagoona lagu tilmaamay inay ku jiraan xubno ka tirsan NISA.

Si kastaba Doorashada Guddoomiyaha Guddiyada doorashooyinka iyo kan xalinta Khilaafaadka ayaa kusoo beegmeysa, iyadoo Dowladda Federaalka wax Jawaab ah ka bixin baaqyadii horey ee Musharaxiinta xilka Madaxweynaha ee ku aadan in Isbedel lagu sameeyo Guddiyada.

Guddoomiyaha Cusub Guddiga doorashooyinka Qaranka Maxamed Xasan Cirro ayaa mar Barnaamij soo saaree kasoo noqday Idaacadda ka hadasha Arrimaha Bani’aadannimada ee Ergo Xarunteeda Magaalada Nairobi, isagoona muddo shan ah ka shaqeynayay.