Akhriso:-Muqtaar Rooboow oo la kulmay Xildhibaanada labada Aqal ee ka soo jeeda Koonfur Galbeed

Magaalada Muqdisho waxaa xalay kulan ku yeeshay xildhibaanada labada Aqal ee ka soo jeeda deegaanada Koonfur Galbeed Soomaaliya iyo Muqtaar Rooboow Abuu Mansuur oo horay uga tirsanaa Al-Shabaab balse sheegay in uu ka baxay.

Kulanka oo ka dhacay Hotelka Royal, Ex City Palace,ee Magaalada Muqdisho ayaa la sheegay in uu ahaa kulan wadatashi ah,oo uu Muqtaar rooboow Xildhibaanada labada Aqal ee koonfur Galbeed uu kala sameynayay wadahadalo uu la yeeshay dowladda Soomaaliya.

Xogaha ay heleyso Dalsan ayaa waxa ay sheegayaan in Muqtaar Rooboow iyo madaxda dowladda qodobada ay hordhigtay ay ka mid ahaayeen in Maleeshiyadkiisa ku sugan gobolka Bakool ay ka mid noqdan Ciidamada xoogga dalka iyo in isagu uu xil muhiim ah ka qabto dowladda.

Muqtaar rooboow ayaa Xildhibaanada uu xalay la kulmay kala tashaday waxa uu ka yeeli lahaa qodobada qaar ee dowladda Soomaaliya ay ka dooneyso,tan ugu weyna ay tahay Ciidamadiisa ku sugan Gobolka Bakool.

Warbaahinta kulankaas dibad joog ayay ka aheyd balse,waxaa xusid mudan in weli Muqtaar rooboow uusan qaadan Go’aan rasmi ah marka laga reebo in uu sheegay ka bixitaanka Al-Shabaab.