24-saac kadib, waxaa Duhurnimadii maanta dib xorriyadooda u helay 2 Taliye oo midkooda Xabsiga Dhexe ee Xamar la dhigay, halka midka kalena lagu soo rogay Xabsi-guri.
Ilo-wareedyo lagu kalsoon yahay ayaa waxay Radio Dalsan u xaqiijiyeen in si wadajir ah loo sii daayey Taliyaha Ciiddanka Tababaran ee Goodir, G/dhexe Bashiir Cabdi Qaasim iyo Taliyaha Ciiddanka sida degdegga uga jawaaba Xaalladaha Degdegga ee RRT (Rapid Response Team), Captain C/fataax Aadan Biid.
Taliyaha Ciiddanka Tababaran ee Goodir, G/dhexe Bashiir Cabdi Qaasim waxa uu isagu muddo 24-sacadood ku xirnaa Xabsiga Dhexe ee Xamar, iyadoo aysan jirin Maxkamad la soo taagay oo xukun ku riday.
Sidoo kale, Taliyaha Ciiddanka sida degdegga uga jawaaba Xaalladaha Degdegga ee RRT (Rapid Response Team), Captain C/fataax Aadan Biid ayaa la sheegay in muddo 24-saacadood lagu hayey xabsi-guri, sida ay Radio Dalsan u xaqiijiyeen Ilo-wareedyo muhiim ah.
Ma cadda sababaha rasmiga ee loo xiray, inkastoo wararka qaarkooda sheegayaan inay ku kaceen Amar-diido.
Dhinaca kale, Madaxda Hay’addaha Ammaanka Eee Xukuumadda Federalka kama hadlin xarigooda, mana jirto xog ku aadan cidda ka dambeeysay xarigooda ama sii-dayntooda.
©Radio Dalsan
