Xiisad dagaal oo Saakay ka taagan deegaanka Tukaraq

Wararka naga soo gaaraya deegaanka tukaraq ee Gobolka Sool ayaa waxa ay sheegayaan in halkaasi Maanta ay ka taagan tahay xiisad dagaal oo u dhaxeysa Ciidamo kala taabacsan Maaamulada Soomaaliland iyo Puntland.

Deegaanka tukaraq ee Gobolka Sool ayaa waxaa Gacanta ku haya Ciidamada Soomaalilan,waxana la sheegay in ay haatan ku dhawaadeen Ciidamo ka tirsan kuwa Puntland,iyada oo halkaasi dhowr jeer uu dagaal ku dhexmaray.

Dadka ku nool deeaganka Tukaraq qaarkood ayaa waxa ay sheegayaan in mararka qaarkood ay maqlayaan rasaas aysan ogeyn cida rideysa taas oo cabsi ku beertay.

Shalay gelinkii dambe ayaa Saraakiil ka tirsan Ciidamada Puntland waxa ay gaareen fariisin Ciidamada Puntland ku leeyihiin meel u dhow deegaanka Tukaraq,waxana Madaxweynaha Puntland iyo Saraakiisha Ciidamada ay horay u shegeen in ay ka Go’an tahay in ay dib u soo ceshadaan deegaankaas oo horay lagala wareegay.

Wararkii u dambeeyey ee naga soo gaaraya deegaanka tukaraq ayaa waxa ay sheegayaan in xiisad ay deegaanka tukaraq ka taagan tahay,iyada oo dadka ku nool ay sheegayaan in ay ka casbi qabaan in dushooda lagu dagaalamo.