Xaflada Caleema Saarka Madaxweynaha Soomaaliland oo Maanta ka dhaceysa Hargeysa

Magaalada Hargeysa ee deegaanada Maamulka Soomaaliland Maanta waxaa la filayaa in ay ka dhacdo Munaasabada Caleemo saarka Madaxweynha Cusub ee Maamulka Soomaaliland Muuse Biixi Cabdi.

Diyaar Garoow ayaa haatan laga dareemayaa Magaalada Hargeysa,iyada oo Wufuud Heer Caalami ay gaareen Hargeysa halka kuwo kale ay haatan ku wajahan yihiin si ay uga qeyb galaan Caleemo saarka

Wasiirka Arrimaha Dibadda Soomaaliland Sacad Cali Shire oo ka mid ah Guddiga qaban qaabada xil wareejinta ayaa sheegay in munaasabada loo qorsheeyay in ay ka qeyb galaan 1,500 Qof oo ka kala imaanaya daafaha Caalamka.

Sidoo kale Xil wareejinta kadib ayaa Madaxweynaha xilka ka sii degaya ee Siilanyo uu wareejin doono dhammaan dukumiintiyada uu ku Shaqeynayay,si heshiisyadii uu galay Maamulka uu Muuse Biixi dhameystiro.

Ammaanka guud ee Magaalada Hargeysa ayaa Maanta aad loo adkeeyay,waxaana la arkayaa Ciidamada Soomaaliland oo taagan Wadooyinka waaweyn e Magaalada Hargeysa,kuwaas oo la socda dhaq dhaqaaqa dadka iyo Gaadiidka.