Wafdi ka socda dowladda oo gaaray jowhar,si ay u qaboojiyaan Xiisada ka jirta halkaas

Magaalada Jowhar ee Xarunta Maamulka Hir-Shabeelle ayaa waxaa Caawa gaaray wafdi Wasiiro ah oo ka socda xukuumadda Federaalka Soomaaliya kuwaas oo la doonayo in farageliyaan xiisada Siyaasadeed ee ka taagan Hir-Shabeelle.

Wafdigaan ayaa la sheegay in uu diray Ra’iisul Wasaare Xasan Cali Kheyre,waxana lagu soo waramayaa in ay haatan ku sugan yihiin Xarunta Madaxtooyada Hir-Shabeelle ee Magaalada Jowhar.

Saacadaha nasoo aadan ayaa la filayaa in ay kulamo kala duwan la qaataan Masuuliyiinta Maamulka Hir-Shabeelle,iyaga oo kala hadli doono dejinta xaalada Siyaasadeed ee Hir-Shabeelle.

Waxaa Wafdiga qeyb ka ah Wasiirka Arrimaha Gudaha iyo Federaalka Cabdi Faarax Juxa, waxaa wehliya Wasiirka Amniga Maxamed Abuukar Islow Ducaale, Wasiirka Waxbarshada, Xildhibaano ka tirsan Labada Aqal.

Sikastaba War-Saxaafadeed uu soo saaray Cali Cabduulaahi Cosoble Madaxweynihii xilka laga qaaday ayaa waxa uu ku eedeeyay Ra’iisul Wasaare Xasan Cali Kheyre in uu masuul ka yahay xilka qaadistii lagu sameeyay.