Khasaaro ka dhashay Gaari lagu rasaaseeyay Shabeellaha Hooso

Saddex ruux oo shacab ah ayaa ku geeriyootay kadib markii dabley hubaysan ay rasaas la dhaceen gaari dad shacab ah ay saarnaayeen oo maraayay duleedka Degmada Afgooye ee Gobolka Shabellaha hoose.

Gaarigaan ayaa lagu soo waramayaa inuu ku dhacay meel Isbaaro ay taalay, laakiin horay aanan loogu ogeyn, iyadoo wadihii gaariga uu qaatay go’aan ah inuusanba istaagin.

Dableydii Isbaarada meesha u taalay ayaa rasaas la dhacay gaarigii, markii uu jiiray Isbaarada, waxaana intaasi kadib dhacday inay halkaasi ku geeriyoodaan saddex ruux oo gaariga saarnaa.

Maydadka saddexda ruux ee geeriyootay ayaa la gaarsiiyay Isbitaalka Degmada Afgooye ee Gobolka Shabellaha hoose, halkaasi oo illaa hadda lagu soo waramaayo inay yaalaan.

Isbaarooyinka ayaa si aad ah ugu badan Gobolka Shabellaha hoose oo Kooxaha manaxayaasha ah dadka ay si aad ah ugu dhibaateeyaan.